弟兄姊妹，平安！
唔知道你尋日有冇投入喺「第18屆香港五旬節聖潔會禱告禁食日」呢？禁食完咗，今日我哋講下「食」。由我講呢個話題，可能你覺得好有違和感。哈哈哈！我係想講下「聖餐」。

返開永光堂，你一定知道我哋每個月嘅第一個主日係「聖餐主日」，其他特別日子，例如受難節、洗禮日，我哋都會共享聖餐。「聖餐主日」成個崇拜嘅流程同其他主日唔同，其中有5個不可或缺嘅環節，呢5個環節將三一真神內部嘅團契及教會呢個從今生延展到永世嘅團契呈現人間。我哋一邊回顧下，一邊獻上代禱。

三一真神嘅團契——聖父、聖子、聖靈——有三個唔同嘅位格，但共同行動。聖父係創造同救贖嘅策動者，基督在世嘅時候亦親自示範及教導門徒要感謝父神。因此喺聖餐崇拜裏面，當我哋回想起救贖嘅恩情，我哋向父神獻上感謝係合宜不過。

代禱（一）
按照目前嘅發展趨勢推測，到2050年，基督徒嘅人口大約維持喺全球人口嘅三成多少少（31.4%），但增長最快嘅信仰群體係穆斯林，到2050年佢哋嘅人口只差少少就佔全球人口嘅三成（29.7%）。 換句話講，從今日起到約廿五年後，每10個人就有7個係我哋嘅福音對象，我哋嘅使命係幫助佢哋通過認識耶穌基督而領受父神所賜嘅救贖恩典。

過去幾年，國際五旬節聖潔會世界差傳部取得不俗嘅成績，目前我哋喺114國家及地區建立咗五旬節聖潔會嘅教會。請記念福音嘅傳播，以及工人們嘅需要。

聖子耶穌基督藉著降世為人，喺十字架上犧牲性命，成就咗聖父喺萬古以先已為人預備嘅救恩。按〈約翰福音〉嘅講法，基督喺十字架犧牲嘅時刻，同時係神得著榮耀嘅時刻，喺關係人類命運嘅一戰上取得絕對嘅勝利；十字架上嘅基督，係得勝嘅基督。

代禱（二）
喺聖餐崇拜裏面，我哋會花唔少時間引領弟兄姊妹回想基督嘅救贖，用經文、畫面、音效、詩歌，令弟兄姊妹觸景生情，記念基督。設計聖餐崇拜嘅程序既需要心思，更需要靈性。

請為一眾參與聖餐崇拜事奉嘅肢體祈禱。記念主席、領詩們，願佢哋對基督嘅救贖有愈來愈深刻嘅認識同體會，然後又能夠感染一眾事奉肢體，各按各職地將程序充分演繹出嚟。

聖靈帶領住教會履行福音使命。傳統上信徒喺聖餐崇拜裏向聖靈呼求，求聖靈幫助佢哋經歷基督嘅真實臨在。其實聖靈喺信徒生命成長上嘅角色無比重要，佢係幫忙我哋通過聖子進到聖父施恩座前嘅保惠師，即係幫助者、勸慰者。

代禱（三）
喺聖餐崇拜裏面，「記念」之後通常都係「堅振」環節。呢個係一個順理成章嘅編排，因為喺基督嘅救贖恩典面前，我哋好容易就諗起自己未必能夠時時都活到「與蒙召的恩相稱」，好需要聖靈嘅加力同扶助。

請為眾肢體日常生活嘅見證祈禱。願我哋對於聖靈微聲嘅呼喚以及聖靈嘅感動敏銳，靠住聖靈克勝人性裏頭嘅閒懶及慾望，活出更像基督嘅生命，咁先可以稱為耶穌基督嘅見證人。

時間關係，我將聖餐嘅第4同第5個神學元素一齊講。教會既係基督嘅身體，又指向天國嘅實現。因此，喺永光堂嘅崇拜生活入邊，只有聖餐崇拜有「肢體相交」呢個環節，我哋將焦點從三一真神轉向身旁嘅弟兄姊妹，因為佢哋係我哋喺信仰上嘅同行者；冇佢哋，我哋無法獨自按基督嘅樣式走完在世嘅路程。聖餐呢個筵席又將信徒嘅目光轉向永世，聖餐係天國筵席嘅先嘗，佢激法我哋在世嘅盼望。

代禱（四）
主耶穌設立聖餐時提醒我哋：「我實在告訴你們，我不再喝這葡萄汁，直到我在神的國裏喝新的那日子。」主以「你們」提醒我哋，我哋已歸屬於一個地上嘅屬靈群體；主以「在神的國裏」提醒我哋，我哋總要記得我哋有一個永恆嘅歸宿。

香港人普遍都好短視。經濟好嘅時候就著眼於現世嘅豐足同享受；一旦經濟唔好，就對人生失去盼望。請為眾牧者祈禱，求主幫助佢哋敬虔，賜佢哋時代嘅觸覺，能藉住講台、屬靈聚會、靈修資料等餵養信徒，激發眾人嘅信、愛、望，更一同為世人送上盼望。

三一嘅真神：
感謝祢豐厚嘅恩典，帶領我哋藉住重溫聖餐嘅含義，為教會及世人獻上祈禱。但願我哋因為知識上嘅成長，喺往後嘅聖餐崇拜中更能經驗到基督喺擘餅與舉杯嘅時候真實嘅臨在，使我哋嘅靈命被救贖之恩所感動，更有在屬靈上奮進嘅熱心，唔單止自己成長，更懂得與眾肢體同行，一齊在世履行福音使命，成為對別人更有益、更榮耀神嘅信徒！
奉主耶穌基督聖名祈禱。阿們。
今日嘅「一窺天下事」喺呢度結束，下週一再見！