弟兄姊妹，平安！
四年一度嘅歐洲國家盃經過一個月嘅比賽，喺十幾個小時之前先至啱啱曲終人散，但另一項四年一度嘅盛事——奧林匹克運動會——又即將喺7月26日展開。今日我哋就傾下「奧林匹克精神」。
聽個名都知，奧林匹克（Olympic）運動會梗係起源於奧林匹亞（Olympia）呢個古希臘嘅城市啦。追溯古希臘的歷史，由於奧運會的獎品是橄欖枝編成嘅花冠，而城邦之間又協議喺比賽期間唔好交戰，於是橄欖枝後來就成為咗和平嘅象徵，所以，最古老嘅奧林匹克精神就係締造和平。
現代奧林匹克運動會喺1896於希臘嘅雅典復辦，只曾因為兩次世界大戰而暫停。此外，2020年夏季奧運會則因為2019新冠病毒大流行而延期，呢件事相信大家都記憶猶尤新。「更快、更高、更強」（Faster, Higher, Stronger）呢句復辦初期就採用嘅奧林匹克格言，去到2021年被國際奧委會修訂咗，喺「更快、更高、更強」之後加上「更團結」（Faster, Higher, Stronger － Together）。我哋不妨細心諗下呢兩句格言嘅意思。
好膚淺咁諗，我哋應該會覺得參加比賽嘅健兒梗係想贏，而佢哋喺鍛鍊練嘅過程中，其實已不斷打贏昨日嘅自己，造出自己嘅最佳成績。到咗比賽，能夠贏埋對手當然係最好啦。所以「更快、更高、更強」除咗係不斷刷新大會紀錄，更重要嘅可能係不斷勝過自己。
預備呢次分享嘅時候，我特登搵啲得獎運動員嘅分享嚟睇下。佢哋不約而同咁講——所以我相信係運動帶畀佢哋共通嘅體會——攞獎真係唔係最重要，學習面對壓力同逆境、學習接納弱點被暴露於人前嘅自己，比起攞獎更能建立一個人。諗番轉頭，奧運比賽最動人嘅時刻，又好似真係唔係啲運動員贏嘅一刻，而係一啲運動員好能夠展現體育精神嘅時刻。
祈禱
我哋都停一停，檢視下自己。我有冇足夠嘅勇氣同毅力去面對壓力同逆境呢？又有幾能夠接納自己嘅弱點暴露於人前，然後仲尋求成長呢？請同主耶穌好好傾下。
代禱
保羅話：「林後十二9〔主〕對我說：『我的恩典是夠你用的，因為我的能力是在人的軟弱上顯得完全。』所以，我更喜歡誇耀自己的軟弱，好使基督的能力覆庇我。」請為我哋信仰群體嘅眾弟兄姊妹祈禱，身為基督徒嘅我哋，要喺屬靈上變得更快、更高、更強，絕對唔係單憑自己嘅勇氣同毅力，而係要依靠主。但願我們一齊成長，令呢個屬靈群體更有氣質！
2021年大會嘅格言嘅修訂，我相信係更符合有「現代奧林匹克之父」之稱嘅法國人古柏坦（Pierre de Coubertin，1863～1937）對大會嘅理念。古柏坦喺奧運會復辦初年多次提及「參與比取勝更重要」嘅精神，咁唔係話唔使爭勝，但畢竟——好似保羅話齋：「林前九24上（和合本）豈不知在場上賽跑的都跑，但得獎賞的只有一人？」——所以，唔係話咩「友誼第一，比賽第二」咁誇張，而係喺「更快、更高、更強」之外，奧運會仲想傳達更重要嘅價值，就係人類團結嘅重要性。
所以，修訂後嘅格言唔係喺「更強」之後用「頓號」再加一項「更團結」，而係用個「破折號」嚟表示「更團結」與前三者嘅關係。有人話，大會修訂呢句格言，用意係藉住呢項全球人類都有分嘅運動盛事，提醒世人要團結起嚟，一齊面對全球生態危機同埋締造世界和平；咁樣一嚟，就巧妙地返到古希臘嘅奧林匹克精神！
祈禱
要「更團結」，人就要改變自己對待他人嘅習慣同態度，所以佢絕對唔係一句號咁簡單。要感動甚至啟發他人，首先我哋就要百分之百擁抱同投入自己嘅信仰或者理念。我記起主耶穌向彼得嘅呼召：「路五10下不要怕！從今以後，你要得人了。」主耶穌唔單止鼓勵彼得接納自己生命嘅本相——罪人，仲呼召佢「改行」，走進一個全新嘅領域。讓我哋又同主耶穌傾下，我哋要點做，先可以參與令信仰群體甚至我哋所到之處嘅人「更團結」？
代禱
奧林匹克精神同和平到底有咩關係？大會想提醒世人：人與人之間嘅鬥爭，只應該發生喺運動嘅賽場上；戰爭，唔係人性嘅一部分。可能我哋會認為：咁講難免有啲曲高和寡。但講番轉頭，叫得做理想嘅，都係有啲崇高嘅。〈以賽亞書〉第二章所講嘅願景都係咁樣：
賽二2末後的日子，耶和華殿的山必堅立，
超乎諸山，高舉過於萬嶺；
萬民都要流歸這山。
⋯⋯
4他必在列國中施行審判，
為許多國民斷定是非。
他們要將刀打成犂頭，
把槍打成鐮刀。
這國不舉刀攻擊那國；
他們也不再學習戰事。
呢幾年我哋見證過、仲見證緊戰爭嘅可怕，但可能好快又麻木咗。今日，我哋就花啲時間，記念人世間嘅戰爭當中受苦嘅人，亦憧憬一下和平嘅景象。
慈悲嘅天父，多謝祢嘅恩典，帶領我哋走過剛才一段思想、祈禱嘅旅程。
巴黎奧運會下個禮拜尾就展開，但願我哋喺賽事之中，再一次見證到好多人類自強不息、公平較量、同舟共濟、挑戰更快、更高、更強，又達致更團結嘅美好景象。
喺我哋自己嘅生命中，求聖靈扶助，賜下決心同毅力，使我哋都能夠喺人生中不畏艱險，迎難而上，展現出我哋人在基督裏應有嘅靈性光輝！
奉主耶穌基督聖名祈禱。阿們。
今日嘅「一窺天下事」喺呢度結束，下週一再見！