弟兄姊妹，平安︕
我係潘耀倫。
為咗對付長期坐喺度做嘢衍生嘅健康問題，我呢幾年夏天好努力咁抓住每個機會去游下水，喺九龍、新界好幾個公眾游池留低咗足跡。久而久之，喺唔同嘅地點都會見到一班長期泳客，從佢哋口中聽到好多人生嘅故事，今日就同大家分享下「游池邊嘅人生百態」︕

分享
唔使問，我去得最多嘅就梗係摩士游池啦。喺嗰度打躉嘅有個六、七〸歲嘅伯伯，其實我未見過佢游水㗎，佢每一日都喺同一個位置度浸水，同埋唱粵曲。係咪好搞笑呢︖不過唔係個個人都會欣賞佢，我就聽過兩個老泳客批評佢，話佢好討厭，夾硬要人聽佢唱嘢。

原來某人行使自由嘅時候，由於與他人身處喺同一個空間，無可避免咁對其他人造成影響，再嚴重啲講，可以係侵犯咗其他人嘅自由。由於世人擁有嘅權力唔同，好多人行使佢哋嘅權力、享受佢哋嘅權利嘅時候，由於無可避免會影響人，甚至本來就係為咗要管促他人，就必然產生大大小小嘅對立，甚至係衝突。

代禱
我哋停一停，讓聖靈引導我哋嘅思緒，睇下呢個故事觸發我哋啲咩思考，可以成為我哋嘅代禱內容。

分享
由於我係游早水，好多泳客都係老人家。佢哋絕大部分係養生族，唔追求成為更快、更高、更強，可以話係與世無爭，甚至唔會要求「勝過昨日嘅自己」。呢個情況同搭地鐵好唔同。當你聽住我講嘢，一聽到搭地鐵，可能滿腦子就係急急腳、爭住入閘、架車閂緊門仲衝入車廂嘅畫面。

或者，人到無求真係品自高。永光堂唔少肢體都已年過半百，愈來愈需要關注養生，要食下 Supplement。喺家庭、事業，或者包括埋教會生活都已經超穩定嘅人生階段，我哋求神繼續吸引呢批肢體，喺信仰嘅知識同經驗方面，繼續努力追求，甚至係急起直追。

代禱
我哋又停一停，讓聖靈引導我哋嘅思緒，為呢班肢體嘅屬靈生命繼續成長並且趨向成熟，繼續為主貢獻自己生命嘅力量而代禱。

分享
有一次，我用啱啱先練成嘅自由式游完一個直池，上氣唔接下氣，喺池邊喘息嘅時候，身邊有個後生仔好大聲同佢個朋友講嘢，我文雅少少咁演繹︓「畀幾個女仔𥄫住，我幾大都游埋佢，死都唔會畀自己停︕」好明顯，佢哋嘅人生階段同金齡人士唔同，佢哋有種唔輸得、唔衰得嘅鬥志，尤其是係喺有人睇住嘅時候︕

時下有唔少年輕人被形容為「啃老族」，或者以「躺平」為生活態度。呢啲社會現象自然有佢哋出現嘅背景同成因，但我哋可以肯定嘅係︓年青係一個好寶貴嘅人生階段。好多人長大以後望番轉頭，都會讚嘆自己當年乜都咁試，乜都咁死，甚至覺得青春無悔。我嘅青少年時代同永光堂少年團契結下不解之緣，到今日，同一齊長大嘅肢體相聚，都係充滿美好嘅回憶。

代禱
我哋停一停，為香港嘅年輕人代禱。呢幾年社會變遷好大，疫情又打擊咗佢哋正常嘅學習，佢哋有自己獨特嘅難處。亦請記念永光堂嘅少年事工，願少年團繼續發揮佢嘅功用，為主造就出一代忠勇嘅信徒。

分享
我從前年幼，現在年⽼，卻未⾒過義⼈被棄，也未⾒過他的後裔討飯。（詩卅七25）
如果抽離咗上下文嘅背景，呢節聖經會顯得好離地，好唔現實，好似無視人間嘅苦難。但其實，詩人正係喺惡人亨通，義人受苦嘅現實處境下，發出信仰嘅宣言，拒絕被現實世界吞噬佢嘅信心，拒絕承認眼前嘅景況就係全部嘅事實。

人生每個階段都有佢獨特嘅優勢同限制，喺教會裏面都係一樣，相對年長、有人生閱歷、信仰較成熟嘅肢體，有提攜年輕人嘅責任，但又要小心唔好窒礙年輕肢體嘅成長。相對年輕嘅肢體有膽量、有活力，甚至有夢想，但要培育立體嘅思維，對自己、對別人，甚至對神，都要有更多耐性。

代禱
主耶穌離世之前，將當時已被猶太人搞得好複雜嘅信仰條文歸納為一條誡命︓我賜給你們⼀條新命令，乃是叫你們彼此相愛；我怎樣愛你們，你們也要怎樣相愛。你們若有彼此相愛的⼼，眾⼈因此就認出你們是我的⾨徒了。」（約⼗三 34∼35）

嚟到分享嘅尾聲，我哋為香港嘅眾教會祈禱︓香港唔少教會都出現斷層，求主幫助眾教會唔同年紀嘅肢體喺教會內學懂互為肢體嘅真理，使教會不但能夠活出主耶穌所嘅吩咐彼此相愛，更加令教會因為每一代人相愛而產生協同效應，令教會發揮最大嘅效能，在世為基督作見證。

親愛嘅天父，
祢將我哋造成各有所長，亦各有缺欠嘅人，
又讓我哋因主之名而聚合成為一群，
我哋為身邊唔同年齡層嘅肢體感謝祢︕
懇求祢幫助我哋學習互相尊重，彼此相愛，
使我們喺同行嘅時候，展現呢個屬靈群體嘅美善，
以致我哋一齊併發成長嘅動力，
喺世上見證主耶穌基督改變生命嘅大能︕
願香港嘅眾教會都不辱使命。
奉主耶穌基督之名祈禱。阿們。

今日嘅「一窺天下事」在此結束。約定你下個週一，再一齊思考信仰，一齊祈禱。
拜拜︕